Soti nan efondreman pou leve kanpe ankò: Rekiperasyon Bill apre yon Arè Kadyak
Bill Bernard abitye viv avèk maladi kè. Apre li te fin fè yon kriz kadyak an 2004, li te jere kondisyon kwonik tankou bradikadi ak fibrilasyon atriyal (AFib) pandan prèske 20 lane.
An 2023, yon moman esansyèl te chanje fason li konsantre sou sante kè li: Pandan li t ap pase vakans nan Florid, li te tonbe akoz yon arè kadyak, li te rete san kè l pa t bat pandan 18 minit jiskaske yo te resisite l avèk sèt chòk defibrilatè.
Li te di "Mwen te prèske mouri plizyè fwa pandan ane yo; mwen te tèlman pre lanmò". "Mwen pa konnen poukisa mwen toujou la, men mwen kontan ke mwen la." Mwen remèsye Bondye chak jou pou sa."
Kriz kadyak la: kòmansman yon batay 20 ane pou sante kè li.
Bill, yon rezidan 71 an ki rete nan Holliston, Massachusetts, te pase anpil ane ap fè kous machin stock car, men apre li te sibi plizyè chòk nan tèt (konmosyon serebral) epi li te oblije pran medikaman pou ralanti san an, li te oblije abandone pasyon sa a. Pandan twa dènye deseni yo, li te travay kòm kontraktè jeneral nan konstriksyon nouvo kay ak renovasyon.
Bill admèt li pa t toujou gen abitid manje ki bon pou kè a. Pandan plizyè ane, li te konn manje midi nan nenpòt boutik sandwich ki te toupre travay li jou sa a, sa ki te vle di souvan anpil vyann ak pitza pafwa tou de.
An 2004, pandan li t ap travay sou twati yon kay, Bill te santi yon doulè nan bra li, men li pa t bay sa anpil enpòtans. Nan mitan lannwit lan, li te leve toudenkou, epi patnè li te genyen lè sa a, yon enfimyè, te rekonèt li t ap fè yon kriz kadyak. Li te ba li plizyè aspirin byen vit epi li te rele 911.
Bill te prèske mouri sou wout pandan li t ap prale nan yon lopital lokal. Apre yo te fin estabilize l, yo te transfere l nan Massachusetts General Hospital, kote doktè yo te mete stent nan atè kowonè dwat li pou louvri l epi retabli sikilasyon san nan kè l.
Foto Bill nan yon kous machin stock
Foto Bill nan yon kous machin stock
Yo te dyagnostike l ak yon valv mitral k ap koule
Operasyon an te reyisi, men dok yo te gen lòt enkyetid pou kè Bill. Kriz kadyak la te febli pati anba kè l, sa ki afekte jan valv mitral la kontwole sikilasyon san an.
"Nan pwen sa a, misk kè l te kapab kontra byen nan pati devan an men pa tèlman byen nan pati anba a," te di Dale Adler, MD, yon doktè kadyovaskilè nan Mass General Brigham ki te vin tounen doktè kè prensipal Bill pita. "Li te gen tou yon valv mitral k ap koule ak yon blokaj nan atè ki bay san nan devan kè a."
Pou prepare Bill pou yon siksè alontèm, chirijyen li yo te fè yon kalite operasyon kè espesyal. Doktè yo te fè yon operasyon kontounman (bypass) lè yo te itilize atè mamè entèn bò gòch la (LIMA) pou amelyore sikilasyon san an nan atè prensipal ki alimante pati devan kè a (LAD)." Kontoune sa a ka dire lontan, sitou si li fonksyone byen nan sis premye mwa yo. Lè sa a, yo te mete yon "bag" alantou valv mitral la pou anpeche l koule.
Fè yon kriz kadyak te yon avètisman pou Bill. "Mwen te konn santi m tankou mwen envensib, tankou mwen pa t bezwen okenn entèvansyon nan men pèsonn," Mwen te nan erè li te di. "Kriz kadyak la te retire envensibilite m nan yon sèl kou."
Siveyans kontinyèl pou bradikardi ak AFib
An 2008, chirijyen li nan Brigham and Women's Hospital te rekòmande pou Bill kòmanse wè Doktè. Adler. "Li se doktè ki pi atansyon mwen te janm genyen," Bill te di. "Kantite enterè li montre nan mwen antanke yon èt imen se yon bagay ki etonan."
Bill te bezwen siveyans alontèm pou plizyè kondisyon, tankou bradikardi (ritm kè ki ralanti). Lè yo te mande l ki jan bradikardi santi, li sonje "li te gen anpil palpitasyon kè detanzantan." Gen kèk jou ki pi bon pase lòt."
Pi bon tretman pou bradikardi depann de gravite li ak sikonstans pasyan an. Nan kèk ka, kondisyon fizik ak fè egzèsis san rete se tout sa ki nesesè. Gen kèk pasyan ki ka bezwen yon pacemaker pou retabli yon ritm kè nòmal.
Bill gen AFib tou. "An tèm de sentòm AFib, mwen sonje mwen te gen yon kè k ap bat vit ak souf kout," li te di.
Opsyon tretman pou AFib yo gen ladan medikaman pou jere ritm kè a epi redwi risk konjesyon serebral. Yon lòt opsyon se ablasyon, yon pwosedi ki vize zòn ki nan chanm anwo goch kè a, kote enpilsyon ki pa nòmal yo soti. Yon twazyèm opsyon se izolasyon venn poumon yo (PVI). Pwosedi sa a kreye ti mak (tisi sikatris) ozalantou venn poumon yo pou bloke siyal elektrik ki pa nòmal yo epi ede kè a kontinye bat ak yon ritm ki nòmal.
Doktè Adler te konsantre sou jere bradikardi ak trete AFib pandan li t ap siveye valv mitral Bill la ki t ap deteryore. Li te mansyone ke lòt entèvansyon, tankou PVI, ta ka nesesè si sentòm li yo vin pi grav.
Men an 2023, Bill te fè fas ak yon nouvo kriz sante: arè kadyak.
Yon ensidan arè kadyak ki te prèske fatal
Nan prentan 2023, Bill ak madanm li Linda t ap kondwi soti Massachusetts pou ale Florid nan machin kay yo. Pandan vwayaj la, Bill te santi yon doulè ekstrèm nan ponyèt li.
Pandan l te nan Florid, Bill te tonbe sibitman epi l te vin koulè vyolè. Paramedik yo te bay li sèt chòk nan yon defibrilatè ekstèn otomatik. Apre li te fin fè 18 minit san kè l pa bat, yo te resisite l.
Bill te pase anviwon yon semèn sou yon ponp kè epi nan yon koma. Apre li te fin soti nan koma a, li te aprann ke stent yo te mete nan atè kowonè dwat li an 2004 yo te bouche. Sa te rive akòz yon boul san ki te fòme nan youn nan stent yo, yon bagay ki ra anpil.
Doktè yo nan yon lopital lokal nan Florid te mete l sou yon aparèy sipò kadyopilmonè (cardiopulmonary bypass), yo rele tou ECMO (Extracorporeal Membrane Oxygenation). Aparèy sa a te pran plas kè li pou ponpe san an pandan doktè yo t ap repare ansyen stent yo.
Yon fwa li te vin ase fò pou sipòte vwayaj la, Bill ak Linda te pran avyon pou tounen Boston.
Bill ak Linda, 1974
Rekiperasyon apre pwosedi TMVR la enpresyonan anpi. Jou swivan, pasyan an ale lakay li, epi kè a pa ponpe san tounen nan poumon yo ankò. Nan ka Bill, li te remake yon diferans nan fason l ap respire depi nan premye moman an. Monte yon eskalye pa t kite l souf kout ankò.
Dale Adler, MD
- Doktè kadyovaskilè, Mass General Brigham
Retabli kè a pou l an sante nèt
Pandan Bill t ap refè, Doktè Adler te mete aksan sou lefèt ke prensipal objektif la se te anpeche yon lòt epizòd arè kadyak. Pou rive fè sa, elektwofizyològ kadyak Bruce Andrew Koplan, MD, te mete yon ICD pou kontwole ritm kè a epi retabli yon ritm nòmal lè sa nesesè.
Apre sa, Doktè Koplan te fè yon PVI pou trete AFib Bill la. (Piske PVI asosye ak yon risk 1% pou aksidan serebral, ekip swen Bill la te chwazi ranvwaye pwosedi a jiskaske sentòm ki gen rapò ak AFib vin pi grav.)
Apre sa, Doktè Adler te pran swen valv mitral Bill la, ki te febli rive nan pwen li te bezwen entèvansyon. Pinak Bipin Shah, MD, yon kadyològ entèvansyonis, te fè yon reparasyon valv mitral transkatetè (TMVR). Nan ti operasyon ti ouvèti nan kò sa a, yo enstale yon katetè (yon tib mens, vid) nan yon veso sangen pou ranplase valv mitral la.
Rekiperasyon apre pwosedi TMVR la enpresyonan anpil" Doktè Adler te di. "Pasyan an retounen lakay li jou ki vin apre a, epi kè a pa ponpe san tounen nan poumon yo ankò. Nan ka Bill, li te remake yon diferans nan fason l ap respire depi nan premye moman an. "Lè li monte mach eskalye yo, li pa santi l souf kout ankò.
Chanjman nan fòm vi pou ankouraje sante kè ki kontinye
Kòm yon pati nan rekiperasyon li, Bill adopte chanjman pozitif nan fason li ap viv. Li dilijan nan fè egzèsis epi kenbe yon rejim alimantè ki an sante. Kounye a li manje mwens vyann wouj epi plis salad, fwi, poul ak pwason.
"Mwen tounen nan yon lavi nòmal, pou sa mwen ka wè," li te di. "Lavi a bèl ankò, ann di sa konsa."
Bill prese bay Doktè Adler kredi pou anpil nan rekiperasyon li an. Adler ak ekip li a nan Mass General Brigham. Doktè Adler, an retou, admire devouman Bill pou kondisyon fizik, disiplin alimantè ak mantalite pozitif, tout sa ki kontribye nan rekiperasyon siksè li.
"Nou fè l mache sou yon machin kouri dènyeman pou evalye l," Doktè Adler te di. "Li te fè menm jan ak yon moun ki pa t janm fè fas ak tout pwoblèm sante li genyen yo."
Lè l ap pale ak lòt moun k ap fè fas ak pwoblèm sante kwonik, Bill konseye yo mete konfyans yo nan pwofesyonèl medikal ki kalifye. Li ensiste tou sou enpòtans pou koute siyal kò w. Inyore siy tankou fatig oswa pikotman nan bra kapab riske; se pou w rapòte yo bay doktè ou san pèdi tan pou jwenn entèvansyon ak swen a tan.
Anfen, Bill rekòmande pou jwenn yon bon sant medikal, menm jan li te fè ak Mass General Brigham.
Li teb di "Mwen vrèman dwe remèsye Mass General Brigham". "Doktè yo, enfimyè yo ak tout lòt moun k ap travay la tèlman pran swen moun." Sa toujou fè m santi m anpè. Yo pran swen w byen."