Kesyon yo Poze Souvan sou Viris Respiratwa Sensityal (RSV)

Konsènan RSV

Ki moun ki gen pi gwo risk pou yo devlope yon ka RSV ki grav?

Kèk gwoup granmoun ak timoun gen plis risk pou yo devlope yon ka RSV ki grav.

Gran Moun

• Gran moun, sitou moun ki gen 75 an oswa plis
• Gran moun ki gen maladi kè oswa maladi poumon kwonik
• Gran moun ki gen sistèm iminitè febli
• Gran moun ki gen lòt kondisyon medikal kache, tankou maladi ren oswa fwa, kondisyon newolojik oswa neromiskilè, maladi san, oswa dyabèt
• Gran moun k ap viv nan mezon retrèt oswa nan etablisman swen alontèm

Timoun

• Tibebe ki fèt prematire anvan 37 semèn gwosès
• Tibebe jiska 12 mwa, sitou sa ki gen 6 mwa oswa mwens
• Timoun ki poko gen 2 zan ki gen maladi poumon kwonik oswa maladi kè konjenital (ki la depi nesans)
• Timoun ki gen sistèm iminitè febli
• Timoun ki gen maladi newomiskilè (maladi ki afekte fason sistèm nève a ak mis yo travay ansanm). Sa gen ladan timoun ki gen difikilte pou vale oswa pou retire larim poukont yo

Gade sitwèb CDC a pou plis enfòmasyon sou granmoun oswa timoun ki gen pi gwo risk pou yo gen RSV ki grav.

Kijan RSV pwopaje?

RSV pwopaje nan fason sa yo:

• Si yon moun ki gen RSV touse, estènen, oswa mouche nen l toupre w
• Manyen, bo, oswa bay lanmen ak yon moun ki gen RSV
• Manyen sifas oswa objè pataje yon moun ki gen RSV te manyen tou, tankou yon manch pòt oswa jwèt

RSV ka pwopaje rapidman nan espas ki fèmen epi pataje, tankou sant gadri, lekòl, mezon retrèt, oswa kay ki gen anpil moun.

Ki konplikasyon posib ki ka genyen nan RSV?

Nan timoun, konplikasyon RSV ki pi kouran yo se bwonkolit (enflamasyon ti pasaj respiratwa nan poumon) ak nemoni (enfeksyon nan poumon). Bebe ki mwens pase 12 mwa yo plis chans pou gen konplikasyon grav.

Nan granmoun, RSV ka lakòz nemoni oswa agrave kondisyon kwonik tankou opresyon, maladi poumon obstriktif kwonik (COPD) ak ensifizans kè konjestif (CHF).

Prevansyon ak vaksen

Kijan mwen ka anpeche maladi viral tankou RSV?

Ou ta dwe swiv rekòmandasyon ki anba yo. Si ou gen yon timoun, ou dwe ede l fè sa ki annapre yo:

• Itilize yon twal oswa yon manch rad ou pou w touse ak estène men pa itilize men w yo.
• Lave men ou yo souvan ak savon ak dlo pandan omwen 20 segond.
• Evite kontak sere ak lòt moun. Sa gen ladan l bay lamen ak pataje tas ak istansil nou manje.
• Netwaye sifas yo manyen souvan yo tankou manch pòt ak aparèy mobil.

Anvizaje pou w mete yon mask oswa pou w limite tan w ap pase nan espas ki gen anpil moun yo oswa ki pataje yo tankou gadri, makèt oswa sant komèsyal.

Konsèy prevansyon sa yo ap ede w anpeche nenpòt maladi respiratwa, pa sèlman RSV, epi yo se bon pratik pou tout fanmi an adopte.

Ki moun ki ka jwenn yon vaksen pou RSV?

Administrasyon Manje ak Medikaman (FDA) apwouve yon vaksen pou RSV pou gran moun ak moun ki ansent.

Vaksen pou moun ki gen 50 an oswa plis

Èske mwen ta dwe pran vaksen RSV a si mwen gen 50 an oswa plis?

Yo rekòmande vaksen RSV a pou tout moun ki gen 75 an oswa plis oswa pou moun ki gen faktè risk ki gen 50 an oswa plis. Sinon, sa depann de dosye medikal ou. Gran moun ki gen kèk pwoblèm sante gen plis risk pou yo gen maladi grav akoz RSV. RSV ka pi grav pou kèk gwoup moun, sa ki mete yo nan risk pou bezwen lopital. Pwoblèm sante ki ogmante risk pou maladi grav yo gen ladan yo:

• Maladi kè
• Maladi nan poumon
• Maladi ren oswa fwa
• Pwoblèm newolojik oswa newomiskilè
• Maladi san
• Dyabèt
• Sistèm iminitè ki febli
• Laj avanse (75 an oswa plis)
• Frajilite
• K ap viv nan yon etablisman swen alontèm.

Sitwèb CDC a gen plis enfòmasyon sou granmoun ki gen pi gwo risk pou yo gen RSV ki grav. Vaksen RSV a diminye risk pou enfeksyon nan sistèm respiratwa enferyè yo, tankou nemoni. Si ou gen youn nan pwoblèm sante ki anwo yo, ou gen plis chans pou benefisye de vaksen an.

Moun ki an sante ki gen 50-74 an ki pa gen okenn nan pwoblèm sante sa yo ka gen mwens chans pou yo benefisye de vaksen sa a paske yo gen mwens risk pou yo gen enfeksyon RSV ki grav.

Efè segondè vaksen an kapab genyen: doulè nan sit enjeksyon an, fatig, doulè nan misk ak tèt fè mal. Efè segondè ki pi grav yo ra. Gade sitwèb CDC a pou plis enfòmasyon.

Li enpòtan pou ou pran an konsiderasyon avantaj vaksen an ak efè segondè yo. Li plis enfòmasyon sou vaksen RSV a.

Si ou gen plis kesyon, tanpri pale sou yo ak pwofesyonèl sante ou a nan pwochen vizit ou a. Oswa planifye yon vizit vityèl pou w konnen si vaksen an ap bon pou ou.

Ki kote mwen ka jwenn yon vaksen RSV?

Granmoun ki gen 50 an oswa plis ka jwenn yon vaksen RSV nan pifò famasi san yon preskripsyon.

Èske mwen ka jwenn vaksen sa a ansanm ak lòt vaksen mwen yo?

Yo ka administre vaksen RSV a ansanm ak lòt vaksen pou granmoun, tankou vaksen pou grip ak vaksen COVID-19. Pou pasyan ki pa vle pran vaksen yo ansanm, ou ka kite 1-2 semèn pase avan w pran lòt vaksen yo.

Vaksen pou moun ki ansent

Èske mwen ta dwe pran vaksen an si mwen ansent?

Youn nan vaksen RSV yo, Abrysvo®, se kounye a rekòmande pou moun ki gen ant 32 ak 36 semèn gwosès pandan mwa Septanm rive mwa Janvye. Moun ki ansent ka resevwa vaksen sa a pou ede yo pwoteje tibebe yo apre akouchman. Aktyèlman, yo rekòmande vaksen RSV a nan yon sèl dòz. Si ou te resevwa li nan yon gwosès avan sa, tanpri konsilte lòt fason pou ede ou pwoteje nouvo tibebe ki fenk fèt ou a anba a. Pou w jwenn plis enfòmasyon, konsilte sitwèb CDC a.

Kijan nouvo vaksen an ede pwoteje tibebe mwen an kont RSV?

Lè yo bay vaksen an pandan gwosès la, li kreye antikò ki soti nan manman an epi yo pase bay tibebe a. Sa yo pwoteje tibebe a, kit li alimante ak tete oswa non. Antikò yo ede tibebe yo konbat enfeksyon apre akouchman. Etid montre ke vaksinasyon manman an diminye risk pou tibebe ak RSV bezwen lopital depi yo soti nan akouchman jiska 6 mwa. Nouvo tibebe yo pi byen pwoteje lè vaksen an bay omwen 2 semèn anvan akouchman.

Kijan mwen ka konnen vaksen sa a san danje pou mwen menm ak tibebe mwen an?

Esè klinik yo montre pa gen efè segondè grav ni nan manman ki resevwa vaksen an ni nan tibebe yo. Vaksen sa a sanble ak lòt vaksen yo.

Ki kote mwen ka jwenn Abrysvo?

Abrysvo® disponib nan Mass General Brigham pou fanm ansent pandan sezon otòn sa a. Tanpri, kontakte pratikan obstetrisyen ou a pou mande sou disponiblite a.

Fanm ansent ka bezwen yon preskripsyon oswa otorizasyon alavans pou w jwenn vaksen an nan yon famasi. Tanpri, rele famasi ou a pou konfime yo gen Abrysvo®. Pri a ka varye tou selon konpayi asirans ou an. Tanpri, rele konpayi asirans ou an si ou gen kesyon sou pri a.

Èske mwen ka jwenn vaksen sa a ansanm ak lòt vaksen mwen yo?

Yo ka administre vaksen RSV a ansanm ak lòt vaksen pou granmoun, tankou vaksen pou grip ak vaksen COVID-19. Pou pasyan ki swete separe vaksen yo, ou ka tann 1 a 2 semèn ant chak vaksen.

Tretman prevantif pou timoun

Mwen enkyè pou pitit mwen ka trape RSV. Kisa ki disponib pou pwoteje pitit mwen an kont enfeksyon RSV?

Pa gen vaksen pou timoun. Men, gen tretman antikò monoklonal ki ka ede pwoteje tibebe ak timoun piti kont enfeksyon RSV ki grav. Antikò monoklonal yo pa vaksen. Yo bay yon kouch siplemantè defans kont enfeksyon RSV yo.

Si ou gen kesyon, ou ka poze ekip swen pitit ou a. Yo ka pale sou pi bon opsyon pou tibebe ou a. Pou plis enfòmasyon, gade sou sitwèb CDC a.

Sentòm yo

Ki sentom maladi respiratwa yo ak kisa mwen ta dwe fè?

Moun ki enfekte ak RSV jeneralman montre sentòm 4 a 6 jou apre enfeksyon an. Sentòm yo parèt etap pa etap olye ke tout an menm tan. Pou tibebe ki fèk fèt ak gen RSV, sentòm yo ka limite a iritabilite, aktivite ki bese, ak difikilte pou respire.

Kisa ki sentom ki lejè yo?

Sentom ki lejè yo gen ladan yo nen ki koule, tous, estène, konjesyon ki lejè, ak lafyèv ki ba. Lafyèv ki ba yo se:

• Tibebe ki poko gen 3 mwa: nenpòt tanperati ant 99°F (37.2°C) ak 100.4°F (38°C)
• Tout lòt moun: nenpòt tanperati ant 100.4°F (38°C) ak 102.4°F (39°C)

Oumenm oswa pitit ou a ka gen mwens apeti, men asire w ou ap pran ase likid. Ou ka konnen si pitit ou ap pran ase likid selon konbyen fwa li ap pipi. Pou tibebe ak timoun piti, sa vle di yo ta dwe gen yon kouchèt mouye omwen chak 8 èdtan. Pou timoun ki gen 3 lane oswa plis, ansanm ak granmoun, sa vle di pipi omwen yon fwa chak 10 èdtan.

Kisa mwen dwe fè si pitit mwen an oswa mwen menm gen sentòm ki lejè?

Repoze, bwè anpil likid epi siveye sentòm yo. Nan pifò ka yo, oumenm oswa pitit ou a ta dwe kòmanse santi l pi byen apre kèk jou.

Èske mwen oswa pitit mwen an bezwen teste pou RSV oswa lòt viris?

Gen anpil viris respiratwa ki ka lakòz sentòm ki sanble ak rim. Pifò ka RSV ak lòt viris yo disparèt pou kont yo nan 1-2 semèn. Depi sentòm RSV ak lòt viris respiratwa yo sanble ak COVID-19, oumenm oswa pitit ou a ka fè tès pou COVID-19 lakay ou. Si pitit ou a teste pozitif pou COVID-19, swiv gid izolasyon CDC yo. Si oumenm oswa pitit ou a gen sentòm ki lejè, li pa nesesè pou teste pou lòt viris.

Timoun

Rele ekip swen pitit ou a si li montre nenpòt nan sentòm sa yo:

• Lafyèv lakay tibebe ki gen mwens pase 3 mwa: Tanperati ki depase 100.4°F (38°C)
• Lafyèv pou tibebe ki gen plis pase 3 mwa ak timoun ki pi gran yo: Tanperati ki depase 105°F (40.5°C), tanperati ki depase 102.4°F (39°C) ki pa reyaji ak medikaman ki diminye lafyèv, oswa lafyèv ki dire plis pase 3 jou
• Efò pou respire ki ogmante. Sa a enkli respirasyon kout, sipèfisyèl ak rapid, oswa yon anfonsman nan espas ant kòt yo, oswa yon elajisman nan narin yo ak chak souf.
• Respirasyon an sifle (yon bri tankou siflèt lè w ap respire)
• Pa pran likid ak/oswa pipi a diminye. Pou tibebe yo, sa vle di pa gen yon kouchèt mouye pandan 8 èdtan. Nan ka timoun ki gen 3 lane oswa plis yo, pa gen pipi pandan 10 èdtan.
• Fatig twòp oswa dòmi twòp
• Doulè nan zòrèy oswa gwo mal gòj
• Devlope yon gratèl ki kouvri yon gwo pati nan kò a

Gran moun

Rele doktè swen prensipal ou si ou devlope nenpòt nan sentòm sa yo:

• Gwo lafyèv – yon lafyèv ki depase 102.4°F (39°C)
• Gwo tous
• Souf kout
• Respirasyon an sifle (yon bri tankou siflèt lè w ap respire)

Sentòm grav – Ijans

Ale nan Depatman Ijans si ou menm oswa pitit ou a gen sentòm grav, tankou:

• Difikilte pou respire
• Poz nan respire pandan 20 segonn oswa plis
• Enkapasite pou reveye oswa rete reveye
• Po, bouch, oswa kabann zong ki pal, gri, oswa ble, selon koulè po a

Tretman

Èske gen tretman pou RSV?

Pa gen okenn medikaman espesyal pou trete RSV. Antibyotik pa trete RSV. Pou ka grav ki mande pou trete nan lopital la, oumenm oswa pitit ou ka resevwa:

• Sipleman oksijèn
• Likid IV pou dezidratasyon

Oumenm oswa pitit ou ka resevwa lòt medikaman tou depann de kondisyon sante yo genyen deja.