Pwogram sipò, tretman, ak rezilyans nan McLean

Apwòch nou nan zafè swen

Si ou menm oswa yon moun ou renmen te kòmanse gen nenpòt nan chanjman sa yo pandan dènye ane a, pwogram STAR la ka kapab ede:

• Santi ou konfonn paske ou pa sèten si yon bagay te yon rèv oswa si li te rive toutbon
• Chanjman nan fason ou panse, tankou vin sispèk lòt moun, gen panse ki pa nòmal, oswa kòmanse kwè bagay ou pa konn abitye kwè
• Chanjman nan sa ou wè oswa tande, tankou vin pi sansib ak son oswa limyè, tande yo rele non ou lè pa gen moun, oswa wè oswa tande bagay lòt moun pa wè oswa pa tande
• W ap mande tèt ou si lòt moun kapab li panse ou
• Ou panse gen yon relasyon espesyal ant bagay ki pa sanble gen okenn lyen
• Difikilte pou panse byen, konsantre, oswa di sa ou vle di
• Ou gen mwens anvi oswa mwens enèji pou fè aktivite ou
• Ou kòmanse rete lwen zanmi ak fanmi
• Ou kòmanse gen pwoblèm nan lekòl oswa travay ou, tankou nòt ou yo bese oswa ou gen difikilte pou fini devwa oswa travay ou
• Difikilte pou pran swen pwòpte pèsonèl ou

Pifò plan asirans kouvri sèvis pwogram STAR la. Dire tretman an varye selon bezwen chak moun. Dire maksimòm tretman an se 3 an.

Si ou bezwen tretman apre premye fwa ou fè yon epizòd sikoz, Pwogram OnTrack la ka yon bon chwa pou ou.

Objektif Pwogram STAR la se bay èd bonè pou ankouraje bon sante mantal, ede moun devlope fason pou fè fas ak difikilte, diminye risk pou devlope sikoz ak lòt pwoblèm sante mantal, epi amelyore fason yo viv lakay, lekòl, travay, ak nan relasyon ak lòt moun.

Pou jèn ak jèn adilt ki gen sentòm ki ka montre yo gen risk pou devlope sikoz, etid yo montre ke lè yo aprann fason pou fè fas ak difikilte epi yo jwenn tretman bonè, sa ka ede diminye risk pou yo devlope pwoblèm sante mantal ki pi grav. Sa ka ede tou diminye soufrans, amelyore fason yo viv kounye a ak alavni, epi ede yo bati bon relasyon ak lòt moun.

Pwogram STAR la ede adolesan ak jèn adilt vin pi fò devan difikilte epi li sèvi ak terapi konpòtman ki ede moun chanje fason yo panse ak aji (CBT), nou ede chak moun konprann risk yo genyen pou yo soufri maladi sikoz epi fè yon plan ki adapte ak bezwen yo pou jere sentòm yo, estrès, santiman yo, ak lè yo pa konnen sa k ap vini.

Klinisyen Pwogram STAR la ede pasyan yo kenbe bon abitid chak jou, fikse objektif epi reyalize yo, bati bon rezo sipò, epi pran swen tèt yo..

Tretman an adapte ak bezwen chak mou, ak diferan konpozan tretman ki enkli selon bezwen klinik pasyan an ak objektif gerizon li yo.

Ekip nou an kreye plan tretman ki vize sou bezwen espesifik, valè, idantite, fòs, ak kilti pasyan an.

Tretman ka enkli:

• Evalyasyon risk pou sikoz, planifikasyon tretman, ak edikasyon
• Yon seri kou terapi byen kout pou sentòm risk pou soufri maladi sikoz
• Tretman konbine ki gen ladan terapi endividyèl kontinyèl, tretman medikaman, ak si sa nesesè, terapi byen kout pou fanmi

Yon pati enpòtan nan misyon nou se travay pou devlope tretman efikas ak pèsonalize pa fè rechèch syantifik. Se poutèt sa, nou bay opòtinite pou patisipe volontè nan etid rechèch ki vize konprann idantifikasyon bonè ak entèvansyon pou risk sikoz. Malgre pasyan yo ka mande pou patisipe nan rechèch, patisipasyon pa obligatwa e li pa afekte aksè a swen.

Pwogram STAR la fèt pou adolesan ak jèn adilt ki gen 14–25 an ki te kòmanse fè chanjman nan fason yo panse, konpòte yo, santi yo, oswa fonksyone pandan dènye ane a, epi yo idantifye yo kòm moun ki gen risk pou devlope sikoz.

Pwogram pou pasyan ki pa entène lopital nou an se pou moun k ap viv nan Massachusetts.

Tanpri sonje, Pwogram STAR la pa yon pwogram pou moun ki fè premye epizòd sikoz yo. Pwogram STAR la pa apwopriye pou moun ki deja gen yon dyagnostik sikoz, oswa ki fèk resevwa yon dyagnostik sikoz (tankou eskizofreni, twoub bipolè, oswa depresyon ak sikoz), oswa moun ki fèk entène lopital akoz sentòm sikoz.

Pale ak yon pwofesyonèl ki resevwa fòmasyon sou dyagnostik ak tretman se yon premye etap enpòtan pou jwenn èd bonè, konprann pwoblèm nan, epi jwenn fason pou fè fas ak li.

Pou plis enfòmasyon sou pwogram nan oswa pou jwenn èd pou ou menm oswa fanmi ou, tanpri rele 617-855-4519.

Pifò plan asirans kouvri sèvis pwogram STAR la.

McLean Hospital aksepte Medicare, Massachusetts Medicaid, ak anpil plan asirans prive ak swen jere. Aprann plis enfòmasyon sou plan asirans McLean Hospital aksepte yo.

Li ka ede ou tou pou gade enfòmasyon sou peman swen sante ak èd pou peye.

Kesyon yo poze souvan