false

Viv ak maladi atè kowonè

Yon fanm blan ki pi gran ak cheve kout, blond klè ap souri bay yon gason blan ki pi gran ak cheve kout blan ak bab, pandan yo tou de ap fè makèt pou fwi. Li lonje bra dwat li sou etajè fwi a pandan mesye ki pi gran an ap souri tounen ba li pandan l ap pote yon panye rezen. Etajè fwi nan mache a gen divès kalite fwi tankou pòm wouj ak vèt, sitwon, zoranj, ak chadèk.
/content/dam/unified-xwalk/cf/providers/3000054

Pwen kle pou pasyan yo

Pou jere maladi atè kowonè (CAD):

  • Suiv plan tretman ou. Kadyològ ou ak pwofesyonèl sante ki ba ou swen prensipal la (PCP) prepare yon plan ki adapte ak sante w ak fason w ap viv.
  • Pran medikaman ou jan yo preskri yo: Estatin pou kolestewòl, medikaman pou tansyon ak lòt medikaman ka ede w kontwole CAD epi anpeche konplikasyon.
  • Konnen siy ijans yon kriz kadyak: Aprann sentòm yo epi rele 9-1-1 imedyatman si w santi yo.
  • Prepare w pou randevou yo: Sèvi ak lis «Kesyon pou poze» ki anba paj sa a pou pwochen randevou w ak doktè a.

Kalite maladi kè ki pi komen nan Etazini se maladi atè kowonè (CAD), dapre Sant pou Kontwòl ak Prevansyon Maladi (CDC). Li afekte 1 sou 20 Ameriken ki gen 20 an oswa plis.

“Maladi atè kowonè se lè plak akimile sou mi atè ki bay kè w san, akoz kolestewòl wo ak gwo enflamasyon,” Farouc Jaffer, MD, PhD, eksplike. Doktè Jaffer se yon kadyològ ki fè pwosedi pou trete pwoblèm kè nan Mass General Brigham Heart and Vascular Institute, enstiti pou sante kè ak veso sangen. Li pran swen pasyan nan Massachusetts General Hospital.

Plak fèt ak kolestewòl, grès, selil ak lòt sibstans. Pandan akimilasyon plak la ap fè atè yo vin pi etwat, sikilasyon san nan kè a ka diminye. Sa ka lakòz doulè nan pwatrin, yo rele anjin, e menm ensifizans kadyak. Si atè yo vin bouche nèt, ou ta ka an danje pou fè kriz kadyak oswa lanmò sibit.

Maladi atè kowonè ka gen efè grav sou sante w, epi si yo te dyagnostike w ak CAD, li fasil pou w santi w akable. Erezman, si w suiv plan tretman ekip swen w lan epi w fè chanjman ki an sante nan fason w viv, ou ka jere kondisyon an epi amelyore sante w. Aprann plis sou fason pou viv ak maladi atè kowonè.

Suiv plan tretman maladi atè kowonè ou an.

Li enpòtan pou w suiv plan tretman kadyològ ou a ak ekip swen sante w la te etabli a. Y ap pran an konsiderasyon istorik sante fanmi w, sentòm ou yo ak rezilta tès dyagnostik yo pou detèmine pi bon tretman pou ou. Selon gravite CAD a, plan tretman w lan ka gen ladan l chanje fason w ap viv, pran medikaman, fè pwosedi ak jere nenpòt lòt maladi ki dire lontan.

Fè chwa vi ki pi an sante pou jere maladi atè kowonè.

Abitid vi ki bon pou kè a se yon pati enpòtan nan yon plan tretman pou maladi atè kowonè. Kadyològ ou oswa pwofesyonèl sante ki ba ou swen prensipal la (PCP) ka gide w epi sijere chanjman ki adapte ak sitiyasyon w. Yo ka sijere w:

  • Sispann fimen. Fimen ogmante fòmasyon plak nan veso sangen yo. Sispann fimen enpòtan pou sante kè w, men li ka trè difisil pou w fè sa pou kont ou. Si ou bezwen èd, mande PCP ou sou pwogram sispann fimen Mass General Brigham yo. Yo ka mete w an kontak ak resous, tankou sèvis akonpayman, pou ede w reyisi.
  • Fè egzèsis regilyèman. Egzèsis ka ede ralanti pwogresyon maladi atè kowonè epi amelyore fason kè ou fonksyone. Egzèsis pou ranfòse misk oswa menm mache ka fè yon gwo diferans nan sante ou.
  • Swiv yon rejim alimantè ekilibre. Sèvi ak konsèy ki nan lis makèt nou an pou sante kè pou konsantre sou manje ki diminye kolestewòl ak enflamasyon nan kò ou. Manje grenn antye, fwi, legim ak pwoteyin mèg. Evite manje ki gen anpil kolestewòl. Doktè ou ka rekòmande tou pou ou diminye kantite sèl ou konsome oswa pou ou bwè mwens likid. Lè ou travay ak yon dyetetisyen nan Mass General Brigham, ou ka prepare yon plan repa ki adapte ak sante w, fason w ap viv ak manje ou renmen.
  • Limite kantite alkòl ou bwè. Si ou bezwen èd pou limite bwè alkòl, di PCP ou sa. Yo ka mete w an kontak ak resous pou ede w.
  • Vize pou yon pwa an sante. Si ou gen twòp pwa oswa obezite, doktè ou ka rekòmande pou ou pèdi pwa. Twòp pwa ka mete yon souch sou kè a. Medikaman pou pèdi pwa ka yon opsyon si chanjman nan fason w ap viv pou kont yo pa ede.
  • Fè efò pou dòmi 7 a 9 èdtan chak swa. Dòmi ak sante kè gen yon relasyon sere. Si w gen difikilte pou w jwenn kantite dòmi sa a, oswa si w wonfle anpil oswa si w sispann respire pandan w ap dòmi, di PCP ou sa. Yo ka rekòmande w wè yon espesyalis nan dòmi pou fè tès pou yon twoub dòmi, tankou apne nan dòmi. Apne nan dòmi ka trete, men si yo pa trete l, li ka lakòz pwoblèm grav nan kè ak poumon.
De pen griye ak zaboka ak ze

Pran medikaman sou preskripsyon pou jere maladi atè kowonè.

Ekip swen w lan ka preskri w yon varyete medikaman pou trete maladi atè kowonè ou an. Sa yo ka gen ladan estatin pou diminye kolestewòl ak medikaman pou kontwole tansyon wo (ipètansyon), dyabèt, gwo kantite trigliserid (yon kalite grès nan san), ak enflamasyon.

Pale ak ekip swen sante w la sou pwosedi oswa operasyon ki ka trete maladi a.

Pwosedi ki fèt ak ti ensizyon oswa operasyon pou trete maladi atè kowonè ka gen ladan:

  • Anjyoplasti: Yo itilize yon ti balon pou elaji atè ki vin etwat yo.
  • Mete yon stent (ti tib an metal): Yo mete yon ti tib may nan yon atè pou kenbe l louvri.
  • Pontaj atè kowonè: Yon chirijyen itilize yon veso sangen ki soti yon lòt kote nan kò a pou fè san an pase nan yon lòt chemen atravè kè a.

Jere lòt kondisyon sante kwonik.

Sèten kondisyon kwonik ka kontribye nan maladi atè kowonè, tankou kansè, dyabèt, oswa maladi nan poumon oswa nan ren. Asire w lòt kondisyon sa yo jere ka ede amelyore sante w an jeneral. Mass General Brigham espesyalize nan swen kowòdone plizyè kalite pwofesyonèl sante bay pou trete plizyè maladi. Pwofesyonèl sante ki ba ou swen prensipal yo (PCP) travay sere ak lòt espesyalis nan ekip ou a pou jere maladi ki dire lontan ki afekte sante w.

Reyabilitasyon kadyak pou maladi atè kowonè

Selon sentòm ou yo, ekip swen w lan ka rekòmande yon pwogram reyabilitasyon kadyak. Pwogram sa yo fèt pou ede w refè apre yon kriz kadyak, ensifizans kadyak, oswa lòt pwoblèm kè ki mande swen medikal oswa operasyon. Yon pwogram reyabilitasyon kadyak ba ou yon ekip devwe ki gen ladan ekip swen ou deja genyen an, espesyalis nan nitrisyon ak egzèsis, konseye, ak fizyoterapis. Espesyalis sa yo ap gide w nan aktivite fizik, montre w kijan pou w viv an sante epi ba w konsèy pou jere estrès ak amelyore sante mantal ou.

N ap revize istorik medikal ou, sentòm ou yo, ak rezilta tès ou yo ansanm an detay. N ap poze w kesyon sou aktivite w ak objektif lavi w pou nou desine yon plan tretman pèsonalize pou ou.

Farouc Jaffer, MD, PhD

  • Interventional Cardiologist, Mass General Brigham Heart and Vascular Institute

Viv ak maladi atè kowonè konplèks

“Maladi atè kowonè konplèks rive lè moun gen yon fòm kondisyon an ki pi konplike oswa yo gen lòt kondisyon ki fè li pi difisil pou trete,” Doktè Jaffer di.

Li eksplike, “Nan sèten sitiyasyon, tretman maladi atè kowonè konplèks mande pwosedi pou mete stent ki pi espesyalize oswa pwosedi chirijikal.” Yon egzanp se yon pwosedi ki rele entèvansyon kowonè pèkitane, oswa PCI. Nan yon pwosedi PCI, yo mete yon tib mens ki rele katetè nan ponyèt la oswa nan lenn nan pou mete yon stent nan kè a.

Doktè Jaffer espesyalize nan trete yon kalite maladi atè kowonè konplèks ki rele oklizyon total kwonik (CTO), kote atè yo vin bouche nèt. Operasyon pontaj atè kowonè te konn sèl fason pou trete blokaj sa yo. Men, gras ak amelyorasyon nan fason yo mete stent pou trete atè kowonè ki bouche nèt depi lontan (CTO), pwosedi sa yo vin yon lòt tretman ki efikas.

Paske maladi atè kowonè konplèks mande pou swen ki pi avanse ak espesyalize, Doktè Jaffer ak ekspè yo nan Mass General Brigham adopte yon apwòch miltidisiplinè. Kadyològ ki fè pwosedi pou trete pwoblèm kè ak chirijyen kè travay sere ansanm ak ekip swen w lan pou prepare plan tretman ki adapte ak bezwen w.

“N ap egzamine istorik medikal ou, sentòm ou yo ak rezilta tès ou yo ansanm, an detay. N ap poze w kesyon sou aktivite w ak objektif lavi w pou nou desine yon plan tretman pèsonalize pou ou,” Doktè Jaffer.

Jwenn sipò pou fè fas ak maladi atè kowonè.

Sante mantal se yon lòt eleman enpòtan nan viv ak maladi atè kowonè. Fè fas ak yon kondisyon medikal tankou CAD ka lakòz santiman tristès, enkyetid, estrès, ak kòlè. Estrès ki pa kontwole oswa yon evènman ki boulvèse w ka menm lakòz sendwòm kè kase, yon maladi misk kè yo rele Takotsubo, ki ka bay sentòm yon kriz kadyak.

Si w bezwen èd pou jere estrès oswa si w gen enkyetid oswa depresyon, pale ak pwofesyonèl sante mantal ou, doktè swen prensipal ou oswa doktè espesyalis kè ou. Si w pa gen yon founisè swen sante mantal, doktè w yo ka refere w bay yon konseye oswa yon lòt pwofesyonèl sante mantal. Medikaman pou enkyetid oswa depresyon ka ede tou.

Ou pa oblije fè fas ak dyagnostik maladi atè kowonè (CAD) ou a poukont ou. Pataje dyagnostik ou a ak zanmi ak fanmi, kenbe yo enfòme, epi mande èd si w bezwen sa. Ekip swen w lan ka mete w an kontak ak gwoup sipò pasyan lokal pou pasyan ki gen maladi kè. Li ka itil pou w pale ak lòt moun k ap viv yon eksperyans menm jan an.

Konnen ki lè pou w chèche plis èd oswa swen ijans pou maladi atè kowonè.

Sentòm maladi atè kowonè ki pi komen an se doulè oswa malèz nan pwatrin (anjin). Anpil lòt moun pa gen sentòm. Yo pa konnen yo gen maladi atè kowonè jiskaske yo fè yon kriz kadyak, dapre CDC (sant ameriken pou kontwòl ak prevansyon maladi).

Fè ensten ou konfyans epi rele 9-1-1 si w panse ou ka fè yon kriz kadyak oswa ou gen yon ijans medikal. Siy ak sentòm yo ka gen ladan yo:

  • Anjin, sansasyon sere oswa presyon
  • Doulè oswa presyon nan kou, zepòl, bra oswa do
  • Souf kout ki vin pi mal
  • Feblès oswa vètij
  • Kè plen oswa doulè nan vant ak kranp (pou fanm)
  • Swe

Ki kesyon mwen ta dwe poze doktè mwen sou maladi atè kowonè?

Ou ka gen anpil kesyon apre yo fin fè w konnen ou gen CAD. Pote yon lis kesyon lè w al wè doktè w pou w pa bliye poze okenn kesyon ki enpòtan pou ou.

Men kèk kesyon ou ka poze sou CAD:

  • Kisa k ap lakòz CAD mwen an? Nan ki pwen atè mwen yo bouche? Kijan y ap siveye blokaj yo ak tan?
  • Ki risk mwen genyen pou m fè yon kriz kadyak, epi ki sa mwen ka fè pou m anpeche sa rive? Kilè mwen ta dwe chèche swen medikal ann ijans?
  • Ki sentòm mwen ta dwe siveye? Kilè mwen ta dwe fè biwo w konnen si mwen remake yon chanjman?
  • Ki medikaman ki ta ka bon pou mwen? Kilè yo ta rekòmande yon entèvansyon medikal oswa yon operasyon?
  • Èske gen medikaman mwen ka achte san preskripsyon ki ta ka reyaji ak medikaman doktè preskri m yo?
  • Èske gen aktivite mwen pa ta dwe fè oswa mwen dwe limite, kit se yon kalite egzèsis, aktivite chak jou oswa relasyon seksyèl?
  • Èske gen nenpòt gwoup sipò pou pasyan oswa lòt resous mwen ta dwe konnen?

Maladi atè kowonè mande pou w jere l ak anpil atansyon epi chanje fason w ap viv. Men, lè w suiv plan tretman w lan epi w travay ansanm ak pwofesyonèl sante w yo, ou ka anpeche maladi a vin pi mal epi amelyore sante w.

primary
internal
Aprann sou swen kadyak ak vaskilè nan Mass General Brigham
/content/unified-xwalk/ht/services/heart-vascular